جمعة الغضب بلس تو .. .مليونية الثغر. كانك فيها !

مساء الفل تاني يا ثورجية ويا كنبجية سواء كنتم من قوى ليبرالية  او سلفية اواخوانجية

بس التدوية ديه

 مش للمصلحجية

ورقصني يا جدع :))))

التدوينة  مش عباره عن اللي حصل النهارده من وجهة نظري بس

انا ححاول ادعم كل حته فيها بصورة او فيديو

حشرح احساسي كواحد شارك في جمعة الغضب الثانية

حتكلم عن اللي حصل النهارده من 11 لحد الساعة 4

حتلكم باستفاضة عن الأخوان وموقفهم

حتكلم عن موقف الجيش   و سياده اللوز شاهين

جمعة الغضب الثانية بدأت الدعوة ليها من اسبوعيت تلاته .. وكانت مالهاش مطالب واضحة بس تبلورت في الأخر في 7 مطالب ليس من بينها مجلس رئاسي وليس من بينها دستور جديد قبل الانتخابات لأسباب يطول شرحها ولكن كان هناك اسباب معتبرهه للنزول

تسطيع مراجة تدوينتي السابقة انا عارف انا نازل ليه ..انت عارف ؟

المهم رحت الصبح القائد ابراهيم  .. قابلت الشباب من حملة دعم البرادعي  وشباب من حشد و 6 ابريل وغيرهم وغيرهم و كنت الساعة 12 مرعوب من المنظر الموضوع شكله حيفشل مفيش حد  !!

المهم صلينا ولو ما خلصنا صلاه " كملحدين وكفره وولاد تييييت كماوصفنا البعض  طبعا احنا كمان بنصلي"

المهم اول ما خلصنا صلاة بص حواليا لقيت كل الناشطين كأن  عيالهم بتتجوز .. العدد صدمني وصدمنا كلنا .. لم نتوقع ذلك .. اطلاقا .. تخطت قدرتنا على التفائل اصلا !! بقيت غير متزن عمال اكلم في صحابي .. ومكذبش عليكم حسيت ببعض الشماته في الأخوان و السلفيين

شعرت بالأنتصار عارفين ليه ؟ حسيت بالأنتصار ؟ عشان كان في حرب .. احنا اتهاجمنا مهاجمة الكفار يوم بدر ..  فلا تتوقعوا مننا ان نكون بسماحة الرسول يوم الفتح !!

ما علينا احنا مشينا في الشارع وطلعنا على شارع بورسعيد

ووقفت بعد ساعة من المشي عند كلية سان مارك  وطلعت فوق التندة بتاعت محطة الأتوبيس

ابص ورايا .. مش شايف نهاية  المظاهره عند الشاطبي

ابص قدامي مش شايف نهاية المظاهره عند كليوبترا فمقدرش اقول هيا انتهت فين !!

طبعا انا عمري ما شفت العدد ده غير في جمعتين

 جمعة التنحي المهولة

وجمعة 4 فبراير

احنا مش اقل من مليون في تقديري .. وحياة ربنا انا محايد جدا انا بقول وجه نظري .. انا العدد ده مشفتوش غير في مليونية

فتحت تويتر قلت اشوف الناس بتقول ايه

لقيت رصد كاتبه مئات المتظاهرين في شارع بورسعيد في الأسكندرية

كنت حقع من طولي

موقع اخوان اون لاين بيقولك الميدان في التحرير فاضي

نوارة نجم بتسب وتشم وتلعن الاخوان وبتقول يا بتوع ربنا الكذب حرام حرام " مع انها طول عمرها تدافع عنهم وكانو بيقولو عليها اخوانية"

قعدت اوصف للناس الصورة في اسكندرية واحسبن على رصد

 فضلت ماشي لحد الساعة 4 ونص كنا وصلنا قرب سيدي جابر .. ركبت وروحت

 اجمل الهتافات النهارده

اوعى يا مصري تخون افكارك .. دم الشهدا تاري وتارك " كلمة تخون افكارك اللي قالها صفوان دي هزتني من جوا " انا مش حخون افكاري عشان اي حاجة

هتاف تاني .. قالو علينا بلطجية .. واحنا شباب طالبين حرية

هتاف تالت الأخوان فين المصريين اهم !! ده في الفيديو

هتاف رابع الجدع جدع والجبان جبان واحنا يا جدع حنموت في الميدان ..

هتافات من نوع الشعب والجيش ايد واحده اتقالت محدش رد  ومن نوع حنشيل المشير الليلة دي متقالتش اصلا .. مفيش غلطة في الجيش مع ذلك !!

ده مبدأيا  كلام عن  اليوم  والأعداد والهتافات .. وشهاده الاقي بها وجه الله !!

دولجيتي  حتكلم عن حبة احاسيس وياريت متردش عليا " احا – سيس" لما اتكلم على الأحاسيس اللي كانت جوايا  وعن موقفي من الأخوان وغيرهم

انا بقى احساسي كواحد شارك في جمعة الغضب التانية هو اني كنت بوزع الورق يوم الخميس بليل في باكوس لوحدي وبدي الواحد الورقة وبهرب بسرعة اخاف يضربني من كتر منا صورتي متشوهه عند الناس

يعني انا بشهاده شيوخ الأسلام  السلفيين

علماني .. ليبرالي .. ملحد .. خارج على المجلس العسكري الحاكم

وبلغة البعض الأخر

الفاشل السياسي اللي عايز يمشي البلد على مزاجة

وبلغة الأعلان الرسمي للأخوان المسلمين اني ذاك الخائن الذي يثور على الشعب او يحاول الوقعية بين الشعب والجيش

انا الزنديق .. انا الفاشل .. انا عربيد انا الجاهل .. انا الملحد انا الخائن  !! شعور بالقهر الصراحة .. كان احد اهم الأسباب اللي خلتي احضن في الناس وابوسهم لما شفت العدد اول ما الصلاه خلصت !!

شعور التاني هو الصدمة لما لقيت الكذب البواح على موقع اخوان اونلاين عن اعداد المتظاهرين .. وعلى رصد .. الشعور بالقهر المرادي معرفش يوصلي كنت انتشيت بالعدد خلاص .. كنت بقول قولو زي ما تقولو ... اسكندرية بالذات مدينة بتفهم ومطلعتش بتصدق

شعور تالت ..وكأني صدقت الدعاية ان المسيحين والعلمانين والشيوعين هما حيكونوا قوام هذه المظاهره ..  تنحت ساعة صلاة العصر .. 90 % من الرجال اللي واقفين .. وقفوا يصلو !! تنحت والله

الملحدين بيصلو يا رجالة ..  ربما كانت هذه الثورة اقوى من مئات السنين من العمل الدعوي الي تخلي مئات الألاف من الملحدين يصلو !!

شعور اخير بقى لما شفت الصور والناس بتعلق بتقول ماهم خمس تلاف .. واللي يقول دي صور من جمعة التنحي  ورصد العبقرية اللي بتقول .. طب لو انت كتير بقى .. خايفين ليه من الأنتخابات ؟ واخير الأستاذ الكبير عصام العريان بيقول لا نعرف شيئا عن اوراق تسفيه الثورة التانية !! والأستاذ الأكبر حشمت بيقول مظاهره اليوم كانت ضد الشعب !!

عارفين الشعور التالت ده ايه بقى ؟ الأشمئزاز !!

مش اكتر .. حاسس بالخيانة الصراحة ... حاسس ان فلان الفلاني خان افكاره لما اخذ قرار ان التدليس حلال اذا وافق مصلحته !!

سيادة اللوز بقى .. قالك دي مش مظاهرات حاشده .. قالك الشعب قال نعم للجيش بنة 80 % طب انت تعرف كام واحد انا اعرفهم قلو نعم عشان الأستقرار والدنيا تمشي ونمنتخب رئيس بسرعة والجيش يمشي ؟

مين  الفيه الدستوري اللي قالك ان نعم كانت للجيش ؟  انا عارف الفقيه الدستوري اياه .. هههه معلش مش حقول اسمه انا قررت اني ابقى موضوعي

بس يا سيادة اللوا انت.. بس انت تتخطى الحدود  وتتخطى المنطق وتتحطة كل شيء .. قبل ذلك اعطيتنا 56 ماده بونص على 8 التعديلات

وعملت قوانين بالعبيط من دماغك .. متجيش دلوقتي بعد ما سكتنالك تدخل ب...... !!

ارجوك بلاش تصريحات مستفزة .. !!

بصو يا ثورجية انا اكتشفت ان كثير ممكن يتكلمون بان الأسلام منهجهم .. لا يستحون ان يتمرمغو في قذارة السياسية من اجل مصالح ضيقة ... بصوا يا كنبجية .. يا تنزلو مع او ضد .. يا تعلمو حاجة مفيده .. الشتيمة على الفيس بوك والفرجه على التفلزيون مش عمل ايجابي اطلاقا .. بصو يا اخوانجية فيكم عيال جدعة ومجدع ورجالة ومنهم ناس  كانو معايا النهارده وفيكم ايضا من لا يعرف الانصاف لعقله طريق .. الموضوعية قد خاصمته .. ده انا بتكلم على الشباب اما القيادات ومواقف الجماعة .. فانا لن اعلق سوى بجملة واحده "من حقك ان يكون لك راي وان يكون لي راي ولكن ليس من حقك ان يكون ان موقفك بعدها اني خائن عميل ملحد لأنني اختلف معك في الوسائل وليس  حتى المقاصد  ..." 

..

..

اسكندرية النهارده اثبتتلي انها مازالت مارية وترابها زعفران

تصبحوا على ثورة ..