مساء الفل يا ثورجية
كلها ساعات واشوفكم الصبح في القائد ابراهيم .. وتقابلو بعض في التحرير بعد طول غياب
عشان نتفق الأول
كل واحد نازل لأسباب في دماغه
كل يغني على ليلاه يعني
ناس نازلة عشان مجلس رئاسي
وناس نازلة عشان دستور جديد
وناس نازلة عشان حاسة ان في تار بايت مع الجيش انا مش شايفله اسباب واضحة
وناس حاسة انها متضايقة وحاسة ان الثورة بتتسرق ودول الأغلبية
انا بنتمي للفئة الأخيره دي وحشرحلكم اسباب النزول اللي اظن كلنا نتفق عليها دون مزايدات
انا عايز
1- محاكمات عاجلة وسريعة وعادلة لكل رموز الفساد في مصر وعلى راسهم مبارك على قتل المتظاهرين والأفساد السياسي و الفساد المالي " وليس شوية فلوس يرجعو ونبقى صافي يا لبن حليب يا انجوي
2- محاكمة كل ضباط الداخلية المتهمين بقتل المتظاهرين وتعذيب النشطاء السياسيين وتكريم اسماء الشهداء وصرف التعويضات المناسبة وعلاج المصابين على نفقة الدولة وحصولهم على الرعاية الكاملة والتعويضات المناسبة
3- عزل النائب العام " ويجيبو واحد احسن منه.. مبارك معينوش ومش بيتعولق عشان مينقلش مبارك للسجن ولا بيدخل الناس كده وكده ويطلعهم بعديها بكفالات ولا ناوي يتصالح مع اي حد مقابل 1 %من فلوسه زي عب مجييييد
4- حل المجالس المحلية واقالة المحافظين المحسوبين على النظام السابق وحرمان الحزب الوثني من السياسة لمده 5 سنوات
ومنشوفش وشوشهم في مؤتمرات الخراء الوطني ده تاني .. مش طريقة يعني !!
5- رفع حالة الطوارئ والأفراج الفوري عن كل المعتقليين السياسيين بعد وقبل الثورة
ووقف ام المحاكمات العسكرية لأم النشطاء السياسيين
6- القائمة النسبية في مجلس الشعب وبلاش فرهده في مليونية تانية عشانها الجمعة الجاية
7- تأجيل الأنتخابات لحين توافر الظروف الأمنية المناسبة .. وناقص تلات شهور على الأنتخابات ولسة مفيش احزاب ولا قانون مجلس شعب ولا اي ابن لذينة .. بقت صفقة مع الأخوان بره عننا .. انا عن نفسي مش عايز ادخل المجلس الشعب انا عندي 22 سنة بس ادو فرصة للي يستحق يعمل حزب يعمل دعاية مش ناقص 90 يوم ومطلعتوش قانون مجلس الشعب !!
8- انا نازل بكره عشان مش عايز ظابط ابن وزة جيش او شرطة يقول لمصري تاني اركع على ركبك !!
9- حق المصريين في الخارج في التصوييت في كل الأنتخابات
10 - اعادة هيكلة الاجور
ومحدش ابن تيت برضو يهددنا ان البلد بتبوظ والبلد بتخرب ولازم نشتغل وهو شغلته كلامنجي وبياخد 150 الف جنية في الشهر !!
وبالمناسبة النزول بكره بالمطالب دي مش انقلاب على نتائج الأستفتاء .. اللي انقلب عليها اولو احد هو المجلس الموقر .. قصيدي المجلس العسكري لما صوتنا على 8 مواد عطالنا 56 بونص
اخر حاجة بقى
انا مع المجلس الرئاسي ومع الدستور الجديد بجمعية تأسيسية منتخبة وقلت لأ في الاستفتاء عشان كده
ولكن بعد ال 77% العظيمة
ارفض ( كمعظم الناس اللي انا اعرفهم نازلين) فكرة النزول لمجلس رئاسي او دستور جديد قبل الأنتخابات حتى لو انا مقتنع بيها ..
عشان اظهر قدر من الأحترام لأراده الشعب حتى لو لم اكن مقتنع بها !!
لو موافق على المطالب انشر
يا عبد يحاكموا مين بس .. ده لو حسني كان بياكل الورق اللي يدينه كان خلصه في المده دي!! و بعدين يعني ما جايز في صفقات تحت الترابيزة ، مش حنطلع ورقك ، و ما تطلعش ورقنا .. بالنسبة للمواد الزيادة ده هبل بس سببه بسيط ، الناس أول ما الثورة خلصت قعدوا يدادوا في الجيش و هو صدق ورسم نفسه .. مع ان الجيش ده اختيار حسني و احنا وافقنا عليه كده ، والناس اتفلقت تقول اطلبوا بقلب ، الثورة لا تطلب لكنها تملي شروطها .. بس تقول لمين بس! فمن الطبيعي النهارده يعملوا اللي عايزينه
ReplyDeleteالنقطة التالتة الاخوان و غيرهم ، أنا لسه عند رايي ان دي غلطة الاطراف التاني انها ما اشتغلتش ، كان في فرصة رائعة هما ضيعوها و هي التفاف الناس حول مجموعة رموز اثناء الثورة .. كان يطلع كام حزب يلمهم و الناس كانت حتروح وراهم ، المهم أنا ما عنديش مانع مين يوصل ايا يكن اتجاهه .. المفروض اننا بنطالب بنظام و تشريعات صح ، يعني اللي حايغلط الدورة دي ، حينكشح الجاية .. خلي الناس تغلط و تتعلم .. بعدين المهم الدستور مش مجلس الشعب لأن ده اللي حيفضل ، و الدستور ده احنا اللي بنصوت عليه ، علشان كده أنا شايف الكسبان على المدى البعيد هو اللي بيعمل قاعدة شعبية لرأيه في مواد الدستور الجاي .. وفي النهاية أنا مش مخون حد بس باقول، العيب الاكبر ، فينا و في اننا مش بنشتغل / و أنا يا سيدي لا باخد 150 ألف ولا نيلة ,.. الحرامية في كل الدول و عدالة التوزيع شبه مغيبة لكن الناس بتشتغل كويس فلو اترق 10 في المية ولا حاجة التسعين دول راجعين عليك انت ، فرقنا ايه عن زمان؟ ان زمان كان بيترق ال 90 في الميه